• Newyddion    Newyddion    Hydref 2023    Digwyddiad swyddi gwag byw poblogaidd ‘Pa Ffordd Nawr?’ yn dychwelyd am yr ail waith eleni yn dilyn

News Centre

Digwyddiad swyddi gwag byw poblogaidd ‘Pa Ffordd Nawr?’ yn dychwelyd am yr ail waith eleni yn dilyn llwyddiant blaenorol

Postiwyd ar : 12 Hyd 2023

Digwyddiad swyddi gwag byw poblogaidd ‘Pa Ffordd Nawr?’ yn dychwelyd am yr ail waith eleni yn dilyn llwyddiant blaenorol
Bydd y digwyddiad poblogaidd, ‘Pa Ffordd Nawr?’, sy'n cael ei gynnal gan Gyngor Bwrdeistref Sirol Caerffili, yn dychwelyd ar 25 Hydref 2023.

Yn y gorffennol, mae'r digwyddiad wedi denu cannoedd o bobl ifanc sy'n chwilio am gyfleoedd cyflogaeth, addysg neu hyfforddiant. Y tro hwn, bydd y digwyddiad ar agor i unrhyw aelod o'r cyhoedd dros 16 oed sy'n ddi-waith neu'n chwilio am swydd sydd eisiau rhywfaint o wybodaeth a chyngor, rhwng 10am ac 1pm.

Mae ‘Pa Ffordd Nawr?’ mewn partneriaeth â Gyrfa Cymru, ac yn cael ei drefnu ar y cyd gan Wasanaeth Ieuenctid Cyngor Bwrdeistref Sirol Caerffili a Rhaglenni Cyflogadwyedd Caerffili, sydd â'r nod o helpu disgyblion sy'n ymadael â'r ysgol a phobl ifanc sy'n chwilio am gyngor ac ysbrydoliaeth o ran pa lwybr gyrfa i'w gymryd nesaf. Mae hefyd yn anelu at gael pobl ifanc i ganolbwyntio ar arholiadau sydd ar ddod ac yn dangos gyrfaoedd posibl iddyn nhw.

Bydd amrywiaeth o gyflogwyr a darparwyr hyfforddiant yn bresennol, a byddan nhw'n cynnig amrywiaeth eang o gyngor, hyfforddiant, cyfleoedd gwaith a hyd yn oed rai cyfleoedd ar gyfer cyfweliadau ar yr un diwrnod.

Dyma rai enghreifftiau o'r hyn i'w ddisgwyl ar y diwrnod:
 
  • Gwybodaeth am gyrsiau yn y coleg gan Goleg y Cymoedd a Choleg Gwent
  • Gwybodaeth am addysg uwch a chyfleoedd prifysgol
  • Gwybodaeth am brentisiaethau a Thwf Swyddi Cymru Plws
  • Swyddi gwag lleol
  • Cyngor cyffredinol o ran gyrfaoedd
  • Cymorth o ran sgiliau chwilio am swydd
  • Cyfweliadau ar yr un diwrnod

Bydd DJ yn chwarae cerddoriaeth fyw drwy gydol y dydd, a bydd raffl hefyd i'r rhai sy'n bresennol gymryd rhan ynddi am gyfle i ennill aelodaeth hamdden am ddim am fis.

Rydyn ni wedi ymrwymo i ddarparu'r Warant i Bobl Ifanc, sef ymrwymiad gan Lywodraeth Cymru y byddai pawb o dan 25 oed yn cael cynnig cymorth i gael lle mewn addysg neu hyfforddiant, dod o hyd i swydd neu ddod yn hunangyflogedig.

Dywedodd y Cynghorydd Carol Andrews, Aelod Cabinet dros Addysg a Chymunedau, “Yn dilyn ein llwyddiant ni mewn blynyddoedd blaenorol, rydw i'n falch ein bod ni'n gallu cynnal y digwyddiad ‘Pa Ffordd Nawr?’ am yr ail waith yn 2023 ochr yn ochr â Gyrfa Cymru, gyda'r digwyddiad ar agor y tro hwn i unrhyw un dros 16 oed. Rydyn ni wedi ymrwymo o hyd i roi mynediad at gyfleoedd addysg a chyflogaeth i bob person ifanc yn y Fwrdeistref Sirol.”

Bydd y digwyddiad ‘Pa Ffordd Nawr?’ yn cael ei gynnal yng Nghanolfan Hamdden Caerffili ddydd Mercher 25 Hydref rhwng 10am ac 1pm.

Am ragor o wybodaeth, cysylltwch â John Poyner ar 01443 864970 neu e-bostio poynej@caerffili.gov.uk

Newyddion Diweddar
Ymholiadau'r Cyfryngau