News Centre

Fforwm Ieuenctid Bwrdeistref Sirol Caerffili yn nodi Caerffili sy'n Dysgu fel eu mater blaenoriaeth ar gyfer 2024

Postiwyd ar : 08 Mai 2024

Mewn cyfarfod cabinet, a gafodd ei gynnal ddydd Mercher 1 Mai 2024, hysbysodd Fforwm Ieuenctid Bwrdeistref Sirol Caerffili (Gwasanaeth Ieuenctid) y Cabinet am y materion a gafodd eu codi gan bobl ifanc yn y Fwrdeistref Sirol, a thynnu sylw at eu mater blaenoriaeth ar gyfer y flwyddyn.

Mae'r Fforwm Ieuenctid yn galluogi pobl ifanc rhwng 11 a 25 i fynegi eu barn ar faterion sy'n effeithio arnyn nhw. Bob blwyddyn, mae syniadau a materion pobl ifanc yn cael eu nodi mewn ymgynghoriad ledled y Fwrdeistref Sirol gyfan, wedi'u strwythuro a'u trefnu o amgylch pum thema: Caerffili Ffyniannus; Caerffili Saffach; Caerffili sy'n Dysgu; Caerffili Iachach; a Chaerffili Wyrddach.

Yn dilyn Cynhadledd Flynyddol y Fforwm Ieuenctid ym mis Ionawr 2024, nododd pobl ifanc ym Mwrdeistref Sirol Caerffili faterion cyfredol sy'n bwysig iddyn nhw a phleidleisio ar fater blaenoriaeth ar gyfer 2024. Cymerodd 2,428 o bobl ran yn y bleidlais ledled y Fwrdeistref Sirol gyfan, gyda'r mwyafrif (28%) yn pleidleisio ar gyfer Caerffili sy'n Dysgu: Cyffuriau – rhagor o ymwybyddiaeth am y peryglon o gyffuriau (er enghraifft, fêps gyda sylweddau peryglus a chanabis), yn ogystal â llinellau cyffuriau i mewn i'r Fwrdeistref Sirol ac allan ohoni, fel eu mater blaenoriaeth.

Yn dilyn y bleidlais i nodi'r mater blaenoriaeth cyffredinol, ymgynghorodd Grŵp Prosiect y Fforwm Ieuenctid ymhellach â phobl ifanc, drwy gynghorau ysgol a'r Gwasanaeth Ieuenctid, i archwilio'r mater a chael mewnwelediad mwy gwybodus o ran pam bod hwn yn fater o bryder i bobl ifanc.

Roedd rhai o'r themâu cyffredin a ddaeth i'r amlwg o'r ymgynghoriad yn canolbwyntio'n bennaf ar fepio, ac yn cynnwys:

Mynediad at fêps a'u fforddiadwyedd mewn siopau cornel, bariau fêps neu siopau fêps.
Diffyg gwiriadau adnabod oedran yn cael eu cynnal yn y man gwerthu, gan gynyddu argaeledd i bobl ifanc.
Apêl fêps trwy flasau a lliwiau sy'n targedu pobl ifanc.
Pwysau gan gyfoedion a normaleiddio fepio ymhlith pobl ifanc.
Ymddygiadau fepio ar drafnidiaeth gyhoeddus/cludiant ysgol ac yn y gymuned/mewn ysgolion.
Sbwriel fêps yn arwain at blant iau yn eu codi nhw.

Dros y misoedd diwethaf, bydd Grŵp Prosiect y Fforwm Ieuenctid yn dyfeisio rhaglen waith sy'n ymarferol i bobl ifanc ei chyflawni drwy gydol 2024, gyda'r nod o fynd i'r afael â'r mater blaenoriaeth.

Bydd hyn yn cynnwys cysylltu â nifer o wasanaethau'r Awdurdod Lleol a gwasanaethau partner, gan gynnwys: Safonau Masnach, Ysgolion Iach, y Bwrdd Iechyd Lleol ac Iechyd Cyhoeddus Cymru. Bydd y grŵp yn ystyried y gwaharddiad arfaethedig ar werthu fêps untro, addysg ar beryglon ac effaith niweidiol fepio, a phrynu fêps dan oed mewn busnesau bach ledled y Fwrdeistref Sirol.

Dywedodd y Cynghorydd Carol Andrews, Hyrwyddwr Ieuenctid, "Roedd yn wych cael y Fforwm Ieuenctid yn y Cabinet yr wythnos hon, ac i Aelodau gael gwell dealltwriaeth o'r materion sy'n achosi pryder i'r bobl ifanc yn ein Bwrdeistref Sirol.

"Cyfarfod heddiw oedd penllanw eu gwaith caled dros y misoedd diwethaf ac mae'n rhywbeth rydw i'n falch iawn o fod yn rhan ohono.

"Byddwn ni'n parhau i weithio gyda'r Fforwm Ieuenctid i fynd i'r afael â'r materion sy'n cael eu nodi gan bobl ifanc, yn enwedig Caerffili sy'n Dysgu: Cyffuriau, a gafodd ei amlygu ganddyn nhw fel eu mater blaenoriaeth."

Rhannwch y dudalen hon :

Rhannwch ar Facebook

Rhannwch ar Twitter

Newyddion Diweddar

Ymholiadau'r Cyfryngau

Gwasanaethau A i Y