Cartref Gofal Hill View
Y Stryd Fasnachol, Aberbargod, Bargod, CF81 9BU.
Ffôn: 01443 803493
E-bost: admin@hillviewcarehome.co.uk
Adroddiad Monitro Contract
Enw'r Darparwr: Cartref Gofal Hill View, Aberbargod
Dyddiad(au) yr Ymweliad: Dydd Iau 19 Mai, 2022, 11.30 a.m. – 3.30 p.m.
Swyddog Ymweld: Andrea Crahart, Swyddog Monitro Contractau, Tîm Comisiynu Caerffili
Yn bresennol: Sarah Roach, Rheolwr Cofrestredig
Cefndir
Mae Cartref Gofal Hill View wedi'i leoli yn Aberbargod ac mae'n lletya pobl sy'n byw gyda dementia. Mae'r Cartref wedi'i leoli'n agos at amwynderau lleol (siopau, ysgolion ac ati), ac mae wedi'i gofrestru i ddarparu gofal preswyl dementia i 34 o bobl. Ar adeg yr ymweliad roedd gan y cartref 12 o lefydd gwag.
Mae'r Cartref yn fawr ac wedi'i rannu dros 3 lefel. Caiff pobl eu dethol yn ofalus i fyw ar loriau ar adeg debyg yn eu profiad o fyw gyda dementia, er mwyn lleihau unrhyw straen a brofir ac annog ymdeimlad o les. Ar hyn o bryd mae'r llawr uchaf yn wag, felly mae pobl yn cael eu lletya ar y lloriau eraill.
Mae'r Rheolwr wedi'i chofrestru gyda Gofal Cymdeithasol Cymru (corff rheoleiddio'r gweithlu).
Mae Tîm Comisiynu Caerffili yn cael adborth rheolaidd gan weithwyr cymdeithasol a gweithwyr proffesiynol eraill sy'n dod i gysylltiad â'r Cartref, ac yn ystod y flwyddyn flaenorol mae'r adborth a gafwyd wedi bod yn gadarnhaol, gyda chanmoliaeth yn cael ei rhannu, a chyfeirir at rai o'r enghreifftiau ym mhwynt 9 yr adroddiad.
Mae'r Cartref yn cyfleu unrhyw faterion yn rheolaidd i Dîm Comisiynu Caerffili o ran unrhyw faterion Diogelu, achosion Covid-19, pryderon gyda thrigolion, yr adeilad ac ati.
Cynhaliodd AGC (Arolygiaeth Gofal Cymru) arolygiad a gyhoeddwyd ym mis Tachwedd, 2019 a chynhaliwyd ymweliad llawn diwethaf y Swyddog Monitro Contractau (drwy Gomisiynu) yn 2019.
Gan ddibynnu ar ganfyddiadau'r adroddiad, rhoddir camau adfer a chamau datblygu i'r darparwr eu cymryd. Camau adfer yw’r rhai sy’n rhaid eu cyflawni (yn unol â deddfwriaeth) ac mae camau datblygu yn argymhellion arfer da.
Ymweliad monitro blaenorol
Camau Adfer
Diweddaru’r Canllaw Defnyddwyr Gwasanaeth (os oes angen) /dyddiad/dyddiad adolygu i’w nodi.
Amserlen: O fewn deufis. (Rheoliad 19 RISCA). Wedi'i gyflawni.
Dylid ychwanegu cofnod cyfweliad ar gyfer yr aelod o staff HT i'r ffeil. Amserlen: O fewn deufis. (Rheoliad 35 RISCA). Wedi'i gyflawni.
Sicrhau Ansawdd (Adolygiad Ansawdd Gofal) i gynnwys dadansoddiad pellach o'r Cartref (e.e. gwersi a ddysgwyd, canlyniadau adroddiadau arolygu ac ati) Amserlen: Ar unwaith ac yn barhaus. (Rheoliad 80 RISCA). I'w fonitro ymhellach.
Datblygu
Dylid datblygu rhestr wirio Gofal Personol i gynnwys lle i ofalwyr gofnodi pryd mae gofal y geg yn cael ei wneud fwy nag unwaith y dydd. Fel arall, dylid defnyddio ffurflenni Monitro Gofal y Geg BIPAB i gasglu'r wybodaeth hon. Amserlen: O fewn deufis. I'w wirio.
Dylid cadw cofnodion o bob pen cawod sydd wedi'i lanhau yn y Cartref fel ei bod yn hawdd gweld pa rai sydd wedi'u glanhau. Amserlen: O fewn chwe mis ac yn barhaus. I'w wirio
Unigolyn Cyfrifol
Mae'r Unigolyn Cyfrifol yn parhau i roi cymorth da i'r Rheolwr Cofrestredig/tîm staff, ac mae'n goruchwylio'r gwasanaeth a'i ansawdd yn barhaus. Mae disgwyliad yn Neddf Rheoleiddio ac Arolygu Cymru (2016) (RISCA) yr ymwelir â'r gwasanaeth, o leiaf bob chwarter er mwyn cael trosolwg a darparu adroddiadau ysgrifenedig ar berfformiad ac ansawdd y Cartref. Roedd yn amlwg bod adroddiadau wedi'u llunio dros y misoedd blaenorol. Edrychwyd ar yr adroddiadau diweddaraf ar gyfer eleni a gwelwyd tystiolaeth bod adborth wedi'i geisio gan breswylwyr a staff, a bod meysydd eraill wedi'u harchwilio (yr amgylchedd, digwyddiadau, cwynion ac yn cynnwys camau i fynd i'r afael â nhw).
Roedd Datganiad o Ddiben y Cartref wedi'i ddiwygio ym mis Ebrill 2022 ac mae'n rhoi trosolwg cynhwysfawr o'r Cartref Gofal.
Edrychwyd ar y Canllaw Defnyddwyr Gwasanaeth ac roedd yn ymddangos ei fod yn gyfredol, er nad oedd yn cynnwys dyddiad adolygu.
Os/pan nad yw'r Unigolyn Cyfrifol a'r Rheolwr Cofrestredig ar gael, y cynllun wrth gefn fyddai i Ddirprwy Reolwr gyflenwi yn eu habsenoldeb.
Ni welwyd Polisïau a Gweithdrefnau'r Cartref y tro hwn, ond byddent yn ganolbwynt yn ystod yr ymweliad monitro nesaf.
Rheolwr Cofrestredig
Mae'r Cartref Gofal yn gweithredu system teledu cylch cyfyng (system arolygu) sy'n cwmpasu'r holl fannau cymunedol (lolfeydd, cynteddau) yn unig. Mae'r Rheolwr wedi ceisio cael caniatâd gan berthnasau drwy ffurflenni caniatâd wedi'u llofnodi.
Gellir addasu'r tymheredd mewn ystafelloedd gwely unigol drwy thermostatau'r rheiddiaduron er mwyn sicrhau nad yw pobl yn mynd yn rhy gynnes neu'n rhy oer. Yn ogystal, yn ystod cyfnodau o dywydd poeth defnyddir ffaniau trydan ac unedau aerdymheru.
Mae'r Rheolwr yn parhau i gyflwyno hysbysiadau Rheoliad 60 sy'n fecanwaith i adrodd am achosion sydd wedi digwydd e.e. achosion o glefydau heintus, cwympiadau ac ati, a chyflwynir y rhain mewn modd amserol i'r gweithwyr proffesiynol perthnasol e.e. Arolygiaeth Gofal Cymru (AGC), Tîm Comisiynu Caerffili, Iechyd yr Amgylchedd ac ati.
Mae'r Rheolwr yn anfon cofnod Dyletswydd i Adrodd (DTR) at y Tîm Diogelu pan fydd sefyllfaoedd wedi codi sy'n gofyn am gymorth/arweiniad ac o bosibl ymchwiliad pellach ynghylch preswylwyr unigol.
Mae'r Cartref wedi elwa ar berthynas waith dda gyda gweithwyr iechyd proffesiynol h.y. Meddyg Teulu, Nyrs Seiciatrig Gymunedol a'r Tîm Nyrsio Ardal, sy'n sicrhau bod anghenion iechyd pobl yn cael eu diwallu. Fodd bynnag, nid yw rhai agweddau ar Wasanaethau Iechyd Meddwl yn rhedeg i'w llawn gapasiti oherwydd gofynion pandemig Covid-19. Cyflwynir ceisiadau trefniadau Diogelu rhag Colli Rhyddid (DoLS) i'r tîm priodol pan fydd pobl, nad oes ganddynt alluedd i wneud eu penderfyniadau eu hunain, yn dechrau eu lleoliad yn y Cartref.
Hyfforddiant
Mae Cartref Gofal Hill View yn darparu ystod eang o gyrsiau hyfforddi i'r staff eu defnyddio. Cyn pandemig Covid-19, byddai llawer o'r cyrsiau hyn wedi cael eu mynychu wyneb yn wyneb â darparwyr fel Langford's, New Directions, yn ogystal â BIPAB, Tîm Iechyd Meddwl Caerffili a Thîm Datblygu Gweithlu Blaenau Gwent/Caerffili. Fodd bynnag, yn ystod y pandemig nid oedd hyfforddiant wyneb yn wyneb ar gael a byddai'r darparwr wedi dychwelyd i E-Ddysgu.
Mae gan y Rheolwr fatrics hyfforddi i gofnodi'r holl hyfforddiant sy'n cael ei ddarparu a gynhyrchwyd mewn ffordd a oedd yn glir i'w deall. Roedd yn amlwg bod gofalwyr yn cael yr hyfforddiant gorfodol/allweddol diweddaraf, megis codi a chario, cymorth cyntaf/CPR/ymwybyddiaeth strôc, dementia, rheoli heintiau (rheoli covid), a diogelu.
Mae rhai o'r cyrsiau hyfforddi a gynigir yn cynnwys diogelu, diogelwch bwyd, cyflwr y croen, codi a chario, cymorth cyntaf, dementia, rheoli heintiau, meddyginiaeth ac ati. Fodd bynnag, mae Hill View yn darparu llawer o gyrsiau eraill i sicrhau gwybodaeth a lefelau cymhwysedd staff.
Mae'r ‘Cynnig Rhagweithiol – Mwy na Geiriau' (a deddfwriaeth y Gymraeg) yn ei gwneud yn ofynnol i ddarparwyr gofal cymdeithasol ddarparu dulliau cyfathrebu yn Gymraeg heb i'r person ofyn amdano. Mae Hill View yn gweithredu hyn drwy arddangos arwyddion Cymraeg ym mhob rhan o'r Cartref ac mae ganddynt nifer o staff sy'n siarad Cymraeg yn rhugl felly byddant yn gallu cyfathrebu â phreswylwyr sy'n defnyddio'r iaith hon os mai dyna yw eu dymuniad.
Cadarnhaodd y Rheolwr fod llawer o'i thîm staff wedi cyflawni NVQ/QCF Lefel 2 neu 3 mewn Iechyd a Gofal Cymdeithasol ac felly byddant yn gallu cofrestru gyda Gofal
Cymdeithasol Cymru (GCC) pan ddaw'n orfodol i staff mewn Cartrefi Gofal i Oedolion wneud hynny ym mis Hydref 2022.
Staffio
Roedd digon o staff ar ddyletswydd yn ystod yr ymweliad monitro a oedd yn rhoi sylw iddynt ac yn gyfeillgar gyda'r preswylwyr. Fodd bynnag, mae cadw staff yn parhau i fod yn her i'r darparwr o ystyried y prinder gofalwyr yn y sector gofal. Mae unrhyw absenoldebau yn cael eu cwmpasu gan y tîm staff presennol cyn belled ag y bo modd, er bod staff asiantaeth yn cael eu defnyddio pan fo angen.
Archwiliwyd dwy ffeil aelod o staff i benderfynu a oes prosesau recriwtio cadarn ar waith. Roedd ffeiliau'r staff yn drefnus iawn ac yn cynnwys gwybodaeth megis ffurflen gais fanwl, tystlythyrau, Contractau Cyflogaeth, gwybodaeth DBS, cofnodion cyfweliadau, ffotograff o'r aelod o staff a gwybodaeth adnabod. Roedd tystysgrifau hyfforddi yn bresennol ar gyfer rhai cyrsiau a fynychwyd
Roedd yn amlwg o'r 2 ffeil a welwyd bod goruchwyliaeth wedi'i chynnal bob chwarter. Roedd y sesiynau hyn yn cwmpasu e.e. cyflawniadau personol ers y sesiwn flaenorol, heriau/anawsterau a brofwyd, dysgu a datblygu, targedau i'w pennu ac ati.
Archwiliad ffeiliau a dogfennau
Archwiliwyd ffeil preswylydd ac roedd yn cynnwys dogfen DNACPR (peidiwch â cheisio dadebru) ar flaen y ffeil, er mwyn hwyluso mynediad i weithwyr iechyd proffesiynol. Hefyd ar y blaen roedd mynegai, manylion sylfaenol a llun o'r person. Roedd dogfen 'Dyma fi' yn bresennol a oedd yn llawn gwybodaeth am y person a byddai wedi rhoi dealltwriaeth dda iawn i'r darllenydd o'r person, a byddai wedi helpu i boblogi ei Gynlluniau Personol. (Cynhyrchwyd y ddogfen hon gan y Gymdeithas Alzheimer ac mae'n cynnwys gwybodaeth megis cefndir teuluol y person, digwyddiadau bywyd pwysig, pobl/lleoedd, dewisiadau, arferion a phersonoliaeth; y nod yw cynorthwyo staff i gefnogi pobl i leihau unrhyw drallod a diwallu eu hanghenion).
Roedd ffurflenni caniatâd yn bresennol o ran tynnu lluniau a theledu cylch cyfyng, a phwy i gysylltu â nhw mewn perthynas ag unrhyw achosion ac ati.
Roedd y Cynlluniau Personol yn gynhwysfawr iawn, fe'u hysgrifennwyd mewn modd sy'n canolbwyntio ar yr unigolyn, gan adlewyrchu anghenion a dymuniadau'r unigolyn ac roeddent wedi cael eu hadolygu'n fisol. Roedd siartiau eraill yn bresennol hefyd. Roedd Cynlluniau Personol nodweddiadol yn cynnwys sut i gefnogi'r person o ran gofal personol, gofal y geg a thraed, cyflwr y croen, symudedd/trosglwyddo, prydau/diodydd ac ati.
Roedd Asesiad Risg ar gael mewn perthynas ag ymddygiad person ac roedd wedi'i adolygu. Roedd yn amlwg bod hyn yn adlewyrchu digwyddiad a oedd wedi digwydd yn ddiweddar a lle'r oedd gweithwyr iechyd proffesiynol wedi gofyn am gyngor. Roedd Asesiadau Risg addas hefyd ar gyfer meysydd eraill o angen.
Dangosodd y log ymweliadau proffesiynol dystiolaeth o ymgysylltu â'r tîm Mewngymorth Iechyd Meddwl, y Tîm Diogelu, Meddyg Teulu ac ati.
Sicrhau Ansawdd
Roedd yr Unigolyn Cyfrifol ar gyfer y gwasanaeth wedi cynhyrchu adroddiad sicrhau ansawdd chwarterol yn ystod yr wythnosau diwethaf (Ebrill 2022) a oedd yn dangos eu bod wedi ymgysylltu â phreswylwyr yn ystod ei ymweliadau, edrychwyd ar Gynlluniau Personol ar gyfer preswylwyr ac ni chafwyd unrhyw gwynion yn ymwneud â'r gwasanaeth. Fel rhan o'r ymweliad, roedd yr Unigolyn Cyfrifol wedi nodi rhai gwelliannau a chamau gweithredu sy'n ofynnol o ran yr adeilad, y mae rhai ohonynt wedi'u cwblhau, mae rhai ar y gweill ac eraill yn yr arfaeth. Roedd yr adroddiad hefyd yn amlinellu'r trefniadau sydd ar waith o ran Covid-19 a'r trefniadau ar gyfer ymwelwyr â'r adeilad, a diweddariadau staffio. Edrychwyd hefyd ar adroddiad sicrhau ansawdd ar gyfer y chwarter blaenorol a oedd hefyd yn dangos ymgysylltiad da a monitro cadarn.
Cynnal a chadw'r cartref
O ran cynnal a chadw'r cartref, mae'r Cartref yn cyflogi gofalwr sy'n cynnal archwiliadau rheolaidd ym mhob rhan o'r Cartref.
Rhoddwyd gwybod i'r Swyddog Monitro Contractau am waith diweddar i’r cartref a oedd yn angenrheidiol o ran diogelwch tân yn unol â’r contract, ac mae goleuadau wedi'u gosod ym maes parcio'r Cartref.
Diogelwch Tân/Iechyd a Diogelwch
Dyddiad Asesiad Risg Tân diweddaraf y Cartref oedd mis Mawrth 2022 a chynhaliwyd arolygiad gan Wasanaeth Tân De Cymru ym mis Mai 2022. Dywedodd y Rheolwr fod y Swyddog Tân wedi bod yn fodlon â'r arolygiad a bod disgwyl am yr adroddiad asesu llawn. Mae rhai ystyriaethau pellach y mae angen eu gwneud i'r adeilad yn unol â'u hargymhellion.
Roedd ymarferion tân wedi'u cynnal yn rheolaidd bob mis ac roedd cofnodion da yn cael eu cadw ynglŷn â nifer y staff a fynychodd, a chyfarfod dad-friffio ynghylch sut yr aeth y dril.
Rheoli arian pobl
Nid ymdriniwyd â'r maes hwn y tro hwn.
Adborth Preswylwyr/Perthnasau
Mae'r adborth gan weithwyr cymdeithasol sy'n ymweld wedi bod yn gadarnhaol, a derbyniwyd rhai sylwadau gan gynnwys sut roedd gweithiwr cymdeithasol wedi cefnogi gŵr bonheddig i symud i'r Cartref, oedd wedi cael gyrfa filwrol hir a ganddo lawer o eitemau cysylltiedig sydd o bwys mawr i iddo. Ers hynny roedd y Cartref wedi rhoi llawer o feddwl ac ymdrech i arddangos yr eitemau hyn o amgylch ei ystafell, yn union fel yr oeddent wedi bod yn ei gartref cyn iddo gael ei dderbyn. Cyfeiriodd y gŵr bonheddig at eitemau ar waliau ei ystafell wely ac roedd yn falch o hel atgofion amdanynt gyda'r gweithiwr cymdeithasol.
Nododd gweithiwr cymdeithasol arall sut roedd preswylydd yr oedd wedi ymweld â nhw yn ddiweddar wedi setlo yn anhygoel o dda, ac mae ganddynt ystafell wely wych. Roedd y Cartref yn lân ac wedi'i addurno'n dda, gyda staff o gymorth mawr.
Cysylltwyd â pherthynas am eu hadborth uniongyrchol, a ddywedodd ei bod bob amser yn cysylltu â hi ynghylch unrhyw achosion sydd wedi digwydd, a'i bod wedi cael gwybod yn ddiweddar am gwymp yr oedd ei pherthynas wedi'i chael. Dywedodd y perthynas nad oes ganddi unrhyw bryderon am y gofal y mae ei hanwylyn yn ei dderbyn.
Arsylwadau
Roedd rhannau o'r Cartref yn lân, yn ffres ac yn daclus ar adeg yr ymweliad monitro.
Roedd y rhyngweithio rhwng y staff a'r bobl y gofelir amdanynt yn gynnes a chyfeillgar ac roedd pobl yn edrych fel pe baent yn cael gofal da. Roedd y triniwr gwallt yn y Cartref yn ystod yr ymweliad ac roedd llawer o'r menywod yn cael eu gwallt wedi'i wneud.
Mae dull 'mynd gyda'r llif' yn parhau i fod yn amlwg pan fyddwch yn cerdded i mewn i'r Cartref am y tro cyntaf. Mae'r amgylchedd yn gyfforddus iawn, gyda soffas a chadeiriau i bobl eu defnyddio yn y lolfa, ac eitemau o atgofion i ysgogi'r synhwyrau ac eitemau i gyffwrdd â nhw.
Mae cysylltiadau wedi'u creu gyda'r eglwys leol, sy'n cynnal dosbarth crefft wythnosol a'r ysgolion cynradd/meithrin lleol. Bydd yr adnoddau hyn o fudd i'r Cartref ac yn cael eu croesawu yn dilyn y cyfyngiadau yr oedd pandemig Covid-19 wedi'u gosod.
Mae yna ardal feranda fach y tu allan i bobl ei defnyddio sydd â man eistedd, canopi ac sydd wedi'i haddurno ag eitemau garddio.
Arsylwadau amser bwyd
Gwelwyd y profiad amser bwyd yn ystod yr ymweliad ac fe'i cynhaliwyd mewn modd hamddenol, gyda chymorth yn cael ei gynnig lle'r oedd ei angen. Roedd y prydau bwyd yn edrych yn flasus iawn, a gosodwyd y byrddau gyda phopeth y byddai ei angen ar bobl.
e.e. ychwanegion, matiau, cyllyll a ffyrc, llieiniau, diodydd, ac roedd gan bob bwrdd botyn hardd o flodau ffres. Defnyddir y brif lolfa/ardal fwyta ar gyfer amser bwyd ac roedd cerddoriaeth gefndir yn cael ei chwarae.
Camau Gweithredu
Camau Adfer/Datblygu
Nid oedd unrhyw gamau adfer na datblygiadol i fynd i'r afael â hwy yn dilyn yr ymweliad monitro hwn.
Casgliad
Mae pobl yn parhau i fyw a ffynnu mewn amgylchedd sy'n ysgogol, yn ddisglair, yn ddeniadol, wedi'i ddodrefnu'n dda ac wedi'i gynnal a'i gadw'n dda.
Mae dogfennaeth y preswylwyr yn gynhwysfawr iawn ac yn canolbwyntio ar yr unigolyn. Roedd hefyd yn amlwg bod prosesau recriwtio cadarn wedi'u dilyn o ran recriwtio staff addas, ac mae i'w gydnabod bod y Cartref wedi profi sawl her yn ystod Pandemig Covid-19 wrth recriwtio a chadw staff, yn ogystal â salwch yn gysylltiedig â Covid ac ati. Fodd bynnag, mae'r tîm staff wedi dangos ymrwymiad a gwydnwch diwyro yn yr amgylchiadau hyn, gan sicrhau bob amser bod anghenion y preswylwyr yn flaenoriaeth.
Mae'r adborth gan weithwyr proffesiynol sy'n ymweld ac aelodau o'r teulu wedi bod yn ganmoliaethus iawn.
Mae Hill View yn parhau i gynnal gwasanaeth o ansawdd uchel wrth ofalu am bobl sy'n byw gyda dementia.
Hoffai'r Swyddog Monitro Contract ddiolch i'r rheolwr a’r tîm staff am y croeso a'u hamser yn ystod yr ymweliad monitro.
Awdur: Andrea Crahart
Teitl swydd: Swyddog Monitro Contractau, Tîm Comisiynu
Dyddiad: Mai 2022