Pro-Care Support Services

Adroddiad Monitro Contract

• Enw/Cyfeiriad y Darparwr: Pro-Care Support Services, Imperial Buildings, Stryd y Bont, West End, Abercarn, NP11 4SB
• Dyddiad yr Ymweliad: Dydd Llun 20 Tachwedd 2023     
• Swyddog(ion) Ymweld: Amelia Tyler: Swyddog monitro contract, CBS Caerffili
• Yn Bresennol: Lynne Richards: Unigolyn Cyfrifol / Adele Hurn: Dirprwy Reolwr

Cefndir

Mae Pro-Care Support Services yn ddarparwr byw â chymorth newydd o fewn Bwrdeistref Sirol Caerffili ac mae'r cytundeb wedi bod mewn grym er 18 Tachwedd 2021. Mae gan y darparwr dri eiddo, mae un ohonynt yng Nghaerffili a'r ddau arall mewn bwrdeistref sirol gyfagos. Dyma'r ymweliad monitro ffurfiol cyntaf i'w gynnal yn y swyddfa gyda'r bwriad o fynd allan i ymweld â'r eiddo byw â chymorth a chwrdd â'r tenantiaid yn gynnar yn 2024.

Diben yr ymweliad yw mynd trwy ffeiliau staff a chleientiaid a chwblhau'r templed monitro a ddefnyddir o fewn y tîm comisiynu.

Gan ddibynnu ar y canfyddiadau o fewn yr adroddiad hwn, gallai'r Rheolwr dderbyn camau gweithredu cywirol a/neu ddatblygiadol i'w cwblhau. Camau gweithredu cywirol yw’r tasgau hynny y mae'n rhaid eu cwblhau (fel sy’n cael ei lywodraethu gan ddeddfwriaeth ayyb.) a chamau gweithredu datblygiadol yw’r rheini sy’n cael eu hystyried yn arfer da.

Argymhellion Blaenorol

Canfyddiadau o’r ymweliad

Ar adeg yr ymweliad roedd tri thenant yn byw yn yr eiddo a nodwyd bod y rhain i gyd yn wedi'u cefnogi i symud gan CBS Caerffili. Nid oedd unrhyw leoedd gweigion ac ni chodwyd unrhyw bryderon gan y tîm rheoli gofal nac unrhyw asiantaethau allanol.

Cynhaliwyd yr arolygiadau blaenorol gan AGC (Arolygiaeth Gofal Cymru) ar 17 a 30 Mawrth 2022 a bryd hynny ni thynnwyd sylw at hysbysiadau camau blaenoriaeth na meysydd gwelliant. Nid oedd unrhyw adroddiadau diogelu na chwynion wedi'u cofnodi yn ystod y chwe mis blaenorol.

Dogfennau a gafwyd cyn yr ymweliad

Rhannwyd y matrics hyfforddi gyda'r swyddog monitro contract cyn yr ymweliad ac fe'i adolygwyd. Cofnodir y canfyddiadau yn yr adran ymsefydlu a hyfforddi isod.

Darparwyd matricsau goruchwylio ac arfarnu yn dilyn yr ymweliad.

Darparwyd Rotas Staff rhwng 16 – 29 Hydref a 6 - 19 Tachwedd 2023 a chydnabuwyd bod y tri aelod o staff â'r un enw wedi'u cofnodi fel 1, 2 a 3. Argymhellir bod enwau llawn y staff yn cael eu cofnodi er mwyn osgoi dryswch. Sylwyd hefyd bod y rota yn cofnodi amserau fel 7/7 neu 8/8 neu N ar gyfer shifft nos; rhaid i'r rheolwr sicrhau tryloywder a naill ai cofnodi'r patrymau shifft yn y fformat 24 awr neu ddefnyddio am a pm i fod yn glir gan roi amserau dechrau a gorffen.

Esboniodd y rheolwr mai'r lefelau staffio oedd un cynorthwyydd cymorth yn cysgu rhwng 7pm a 7am, a bydd wedyn yn newid i aelod arall o staff o 7am, dau aelod o staff am 8am ac yn cynyddu i dri am 9am. Nodwyd bod pedwar aelod o staff ar ddyletswydd weithiau gan ddibynnu ar yr hyn maen nhw'n ei wneud. Roedd y rota yn cynnwys adran ar gyfer nodiadau gydag unrhyw apwyntiadau, digwyddiadau, neu weithgareddau wedi'u trefnu ymlaen llaw. Mae'n ymddangos bod un achlysur lle'r oedd dim ond un cynorthwyydd cymorth ar shifft rhwng 2 - 7pm pan ddechreuodd y shifft nos.

Unigolyn cyfrifol

Darparwyd copïau o'r adroddiadau rheoliad 73 chwarterol, a nodwyd bod y rhain yn cael eu cwblhau bob yn ail fis sy'n uwch na'r amlder gofynnol. Cwblhawyd yr ymweliadau blaenorol ar 22 Mehefin, 29 Awst a 4 Hydref 2023. Er eu nod wedi rhoi darlun o'r hyn oedd yn digwydd yn y cartref, nid oedd yn tystio i unrhyw sylwadau neu adborth uniongyrchol gan y cleientiaid eu hunain neu'r staff.

Anfonwyd y datganiad o ddiben ymlaen, ac er nad oedd dyddiad adolygu ar y ddogfen na dyddiad adolygu arfaethedig yn y dyfodol, cadwyd y fersiwn electronig ar 1 Ebrill 2022. Er mwyn bodloni gofynion rheoleiddio mae angen adolygu'r ddogfen yn flynyddol a dylid tystio hyn ar y ddogfen.

Gan mai'r unigolyn cyfrifol yw'r rheolwr cofrestredig hefyd, argymhellir ffurfioli cynllun wrth gefn yn y datganiad o ddiben i amlinellu beth fyddai'n digwydd pe bai nhw'n absennol yn annisgwyl am gyfnod.

Roedd polisïau a gweithdrefnau gorfodol yn bresennol gan gynnwys derbyniadau, rheoli haint, cefnogi a datblygu staff, chwythu'r chwiban, meddyginiaeth, a chwynion ayyb. Roedd polisi disgyblaeth staff a pholisïau rheoli haint wedi'u dyddio 7 Tachwedd 2018, ac adolygwyd y rhai eraill ddiwethaf ar 5 Medi 2022. Mae angen adolygu polisïau a gweithdrefnau i sicrhau bod y canllawiau yn parhau yn gyfredol ac felly fe'i hystyrir yn arfer da cynnwys y dyddiad adolygu nesaf.

Gwybodaeth i denantiaid

Fel y tynnwyd sylw ati'n flaenorol, mae'r cwmni yn cefnogi tri eiddo ac maen nhw'n berchen i'r grŵp Burles a hysbyswyd y swyddog monitro contract bod bwriad prynu cartref arall yn y Fwrdeistref Sirol a fydd yn eiddo pum ystafell wely. Dywedodd y rheolwr fod ganddynt berthynas waith dda gyda'r landlord ac mae unrhyw faterion yn cael eu hadrodd a'u cywiro yn brydlon.

Cyfeirir unigolion at y darparwr trwy'r gwasanaethau cymdeithasol a chwblheir yr ymweliad cychwynnol â'r cartref fel arfer gan y gweithiwr cymdeithasol dynodedig i weld a yw'n meddwl bod y lleoliad yn addas.

Mae'r broses dewis tenantiaeth yn dilyn ymweliad y gweithiwr cymdeithasol, os yw'r cartref yn addas, maen nhw'n rhannu'r cynllun gofal, yna bydd y rheolwr yn cwrdd â'r unigolyn ac yn cwblhau asesiad cychwynnol. Ystyrir cydnawsedd ag unrhyw denantiaid cyfredol ac yna cynllunnir cyfarfodydd pontio lle maen nhw'n edrych am ryngweithio gyda staff a phobl eraill sy'n byw yn yr eiddo.

Esboniwyd bod cyfnodau treial a chyfnodau prawf lle maen nhw'n adolygu'r lleoliad ac a yw'n gweithio i bawb dan sylw.

Archwiliad ffeil

Er nad yw wedi'i weld, dywedwyd wrth y swyddog monitro contract bod yr holl ffeiliau cleientiaid yn cael eu cadw mewn cabinetau â chlo yn y cartrefi.

Gwelwyd dwy ffeil ar gyfer gŵyr yn byw yn yr eiddo yng Nghaerffili a nodwyd bod y rhain yn cynnwys asesiadau risg, cynlluniau personol wedi'i hysgrifennu gan Pro-Care ac asesiad integredig wedi'i gwblhau gan yr awdurdod lleol. Roedd y dogfennau yn cynnwys agweddau gan gynnwys gofal personol, cyfathrebu, cyrchu'r gymuned, cyllid, trafnidiaeth, a symudedd. Roedd un ffeil yn cynnwys gwybodaeth yn ymwneud ag alergedd cnau a nam ar y golwg ac ail ffeil yn cynnwys asesiadau risg yn ymwneud â chyrchu'r gymuned a defnyddio'r gegin.

Cydnabuwyd bod un o'r cynlluniau personol wedi'i ysgrifennu yn y person cyntaf sy'n helpu i gynnal y ffocws ar yr unigolyn. Roedd y ddogfen wedi'i seilio ar gryfderau ac yn canolbwyntio ar yr hyn y mae'r unigolyn yn gallu'i wneud yn hytrach na'r hyn mae angen i'r staff cymorth ei wneud. Cafwyd manylion yn ymwneud â hoffterau megis cyfeirio at y gawod fel 'sprinkler' a gwrando ar Bon Jovi. Tynnwyd sylw nad yw'n hoffi diodydd poeth na'r gair 'Na'. Nodwyd gwybodaeth ychwanegol yn ymwneud â'u harfer dyddiol a nodwyd bod yr asesiadau risg wedi'u hadolygu ddiwethaf ar 14 Hydref 2023 a byddai hyn yn cael ei adolygu bob deufis.

Roedd yr ail gynllun personol a welwyd yn nodi pwysigrwydd ymweld â bedd ei fam. Mae'r gŵr yn hoffi wy, selsig a sglodion ac nid yw'n hoffi cael ei frysio na staff yn gwneud pethau ar ei ran y mae ef yn gallu'i wneud ei hun.

Nid oedd y naill ffeil na'r llall yn cynnwys copïau o'r asesiad cychwynnol; mae'n ofyniad rheoleiddio i asesiad manwl gael ei gwblhau cyn dechrau cyflwyno'r gwasanaeth yn amlinellu sut y byddan nhw'n bodloni anghenion yr unigolyn.

Cydnabuwyd bod cynlluniau gofal a chymorth Caerffili wedi'u hadlewyrchu yn y cynlluniau personol, ac roedd y rhain yn cynnwys canlyniadau megis cael ystafell llawr gwaelod i'w alluogi i symud o amgylch yr eiddo yn ddiogel. Argymhellodd y swyddog monitro contract y dylid datblygu'r rhain i gynnwys canlyniadau llesiant yn unol â'r fframwaith canlyniadau cenedlaethol.

Mae asesiadau risg wedi'u cysylltu â'r cynlluniau personol ac yn cynnwys camau i fynd i'r afael ag unrhyw risgiau a adnabuwyd. Roedd asesiad yn ymwneud â mynegi poen, ac argymhellwyd bod hyn yn cael ei gyfeirio at yr asesiad risg ardal briw pwyso.

Nid oedd llawer o dystiolaeth o atgyfeiriadau yn cael eu gwneud i weithwyr proffesiynol allanol ac esboniwyd nad oedd angen hyn, ond roedd cofnodion o apwyntiadau Orthoteg ac adolygiad meddyginiaeth yn cael ei gwblhau ar 15 Tachwedd 2022. Roedd gan y ddwy ffeil broffiliau person coll mewn grym.

Nid oedd y naill gynllun personol na'r llall wedi'i lofnodi a chafwyd cofnod bod un gŵr yn methu llofnodi a'r llall wedi gwrthod. Lle fo'n bosibl, dylid gofyn i gynrychiolydd priodol lofnodi ar eu rhan a dylid cynnwys manylion i dystio eu rhan wrth lunio'r ddogfen.

Polisi'r cwmni yw adolygu asesiad risg a chynlluniau personol bob yn ail fis a nodwyd ar un ffeil bod yr un diweddaraf wedi'i wneud ar 21 Hydref 2023, ond dyma'r unig un a gofnodwyd, felly nid oedd yn bosibl gwirio a oedd hyn yn cael ei wneud bob yn ail fis. Nodwyd eu bod yn edrych ymlaen at y Nadolig a thenant newydd yn symud i mewn. Roedd gan yr ail ffeil fylchau mewn adolygiadau yn cael eu cynnal gan eu bod wedi'u cofnodi ar 18 Ebrill ac unwaith eto ar 18 Hydref 2023. Cyfeiriodd hyn at barti Calan Gaeaf, taith i Borthcawl a dosbarthiadau Zumba. Roedd hi'n braf nodi bod staff wedi sylwi ar gynnydd anferth mewn hyder. Cydnabu'r swyddog monitro contract bod nifer y trawiadau wedi gostwng, a bod pwysau wedi'i gynnal; pwysleisiwyd y byddai'n fuddiol cael gwybodaeth benodol h.y. faint o drawiadau yr oedd wedi'u cael? Ai'r canlyniad (nod dymunol) yw colli, cynnal neu fagu pwysau?

Cwestiynau rheolwr

Cwblheir archwiliadau meddyginiaeth canol mis, ac roedd y ffurflen flaenorol wedi'i chwblhau gan y dirprwy reolwr. Nid oedd unrhyw feddyginiaeth gudd yn cael ei rhoi ac esboniwyd bod y feddyginiaeth yn cael ei chadw mewn cloeriau â chlo yn eu hystafelloedd gwely. Yr aelod o staff sy'n rhoi'r feddyginiaeth sy'n gyfrifol am lofnodi'r siart MAR (Cofnod Rhoi Meddyginiaeth).

Cesglir adborth gan gleientiaid a rhanddeiliaid trwy ddosbarthu holiaduron. Hysbyswyd y swyddog monitro contract bod y rhain wedi'u diwygio i'w gwneud yn fwy cyfeillgar i ddefnyddwyr. Adroddwyd bod y gyfradd ymateb yn is na 40%. Cynhaliwyd trafodaeth yn ymwneud ag adborth a dywedodd y rheolwr nad oedd unrhyw newidiadau wedi'u gwneud yn dilyn yr holiaduron gan eu bod yn cynnig sylwadau cadarnhaol ac nad oeddynt wedi adnabod unrhyw feysydd gwelliant.

Nodwyd bod aelodau o staff a oedd yn gweithio shifftiau nos cysgu a shifftiau dydd a oedd yn golygu eu bod yn rheolaidd yn gweithio mwy na 48 awr yr wythnos. Cadarnhaodd y rheolwr eu bod wedi llofnodi'r ymadawiad i optio allan o'r gyfarwyddeb oriau gwaith a siaradwyd â nhw yn ystod goruchwyliaeth i sicrhau eu llesiant.

Yn ystod yr ymweliad, nodwyd bod y cynnig gweithredol yn cael ei drafod fel rhan o'r asesiad cychwynnol, ond nid oedd tystiolaeth o'r rhain gan nad oedd y dogfennau hyn ar gael. Nid oedd unrhyw staff na thenantiaid yn siarad Cymraeg nac wedi mynegi dymuniad i siarad Cymraeg. Er mwyn cydymffurfio â'r ddeddfwriaeth, rhaid i'r darparwr sicrhau bod hyn yn cael ei drafod fel rhan o'r cyswllt cychwynnol.

Esboniwyd nad yw'r tenantiaid cyfredol yn ffurfiol gysylltiedig â'r broses o ddewis staff newydd posibl. Mae tenantiaid yn cymryd rhan yn anffurfiol a rhoddir cyfle iddynt ofyn unrhyw gwestiynau i'r ymgeiswyr, ond ni chofnodir hyn. Cyfrifoldeb y rheolwr yw ystyried a yw hyn yn rhywbeth y gellid ei ddatblygu yn y dyfodol a bod cofnodion ffurfiol o arsylwadau ac adborth gan y tenantiaid yn cael eu cynnwys wrth wneud penderfyniadau.

Cynhaliwyd trafodaeth yn ymwneud â diogelu a datganodd y rheolwr a'r dirprwy reolwr y byddent yn cysylltu â'r tîm diogelu os oes unrhyw honiad neu dystiolaeth o gam-drin o unrhyw fath. Gan ddibynnu ar natur y pryderon a godir, byddent hefyd yn cysylltu â'r heddlu os oes angen.

Cwynion a chanmoliaethau

Esboniodd y rheolwr bod tenantiaid yn cael eu cefnogi i wneud cwynion trwy gael cyfle rheolaidd i siarad â nhw yn breifat yn yr eiddo. Mae'r canllaw i denantiaid hefyd yn cynnig cyngor cyfeillgar i'r defnyddiwr ar sut i wneud cwyn. Cynhelir sgyrsiau dyddiol gyda staff a chyfarfodydd adolygu ffurfiol gyda gweithwyr cymdeithasol lle gallant godi unrhyw faterion.

Nid oedd unrhyw bryderon wedi'u codi i olrhain achos y camau a gymerwyd ond dywedwyd wrth y swyddog monitro contract pe bai cwyn yn cael ei gwneud, byddai'r achwynydd yn gallu dewis pa fformat yr hoffent dderbyn y canlyniad, a byddai canlyniad ysgrifenedig hefyd yn cael ei ddarparu a'i gadw ar ffeil fel tystiolaeth o gau'r gŵyn.

Gan ddibynnu ar natur y gwyn nodwyd y byddai staff yn cael eu hysbysu mewn cyfarfod 1:1 pe bai'r mater yn gysylltiedig ag aelod o staff unigol, neu os yw'n bryder cyffredinol h.y. parcio yn yr eiddo neu dasgau ddim yn cael eu cwblhau fel sy'n ofynnol, byddai hyn yn cael ei godi fel rhan o'r cyfarfod tîm.

Nid oedd canmoliaethau yn cael eu cynnal yn ffurfiol ac argymhellir bod ffeil canmoliaeth a chwynion yn cael ei gweithredu ym mhob eiddo i gasglu unrhyw faterion y gellir eu cynnwys yn yr adroddiadau chwarterol. Dywedodd y rheolwr bod un o gyfeillion gwirfoddol gŵr yn yr eiddo wedi prynu cardiau rhodd fel diolch i'r staff cymorth am y gofal a ddarperir. Esboniwyd eu bod hefyd wedi derbyn e-bost gan weithiwr cymdeithasol yn canmol ansawdd y gefnogaeth yn y cartref a gofynnodd y swyddog monitro contract am gopi ohono. Roedd hi'n braf nodi bod ganddynt berthnasau da gyda'r cymdogion ac yn eu gwahodd i unrhyw bartïon neu farbeciw a gynhelir.

Sefydlu a hyfforddi

Nodwyd bod y matrics hyfforddi dim ond yn cofnodi mis a blwyddyn yr hyfforddiant; er mwyn sicrhau cywirdeb a thryloywder argymhellir bod y dyddiadau llawn yn cael eu cofnodi.

Roedd tystiolaeth yn y matrics o hyfforddiant gorfodol megis rheoli haint, codi a chario, diogelu, diogelwch tân ac ymwybyddiaeth epilepsi. Roedd llawer o hyfforddiant wedi'i gyflenwi yn 2023 ac nid oedd unrhyw gyrsiau yn gofyn am hyfforddiant diweddaru. Cydnabuwyd nad oedd hyfforddiant wedi'i gofnodi yn ymwneud ag ymddygiad heriol (neu gymorth ymddygiad cadarnhaol) neu gyfathrebu.

Nid yw Pro-Care Support Services yn defnyddio Fframwaith Ymsefydlu Gofal Cymdeithasol, ac esboniodd y rheolwr bod yr holl staff yn gymwys i QCF lefel 2 o leiaf, ac eithrio dau. Nodwyd bod pedwar aelod o staff sy'n gweithio yn y cartref yng Nghaerffili nad ydynt wedi'u gosod ar gofrestr Gofal Cymdeithasol Cymru (yr oedd un ohonynt ar gyfnod mamolaeth). Mae'n ofynnol bod yr holl staff wedi'u cofrestru o fewn chwe mis i ddechrau cyflogaeth.

Hysbyswyd y swyddog monitro contract bod ansawdd yr hyfforddiant a ddarperir yn cael ei werthuso trwy wiriadau ar hap, arsylwadau, goruchwyliaethau ac adborth gan gleientiaid ac ymwelwyr. Esboniodd y rheolwr bod rhan fwyaf yr hyfforddiant yn cael ei gyflenwi ar-lein, a'u bod hefyd wedi cyrchu hyfforddiant trwy awdurdod cyfagos. Dywedodd y swyddog monitro contract y bydden nhw'n cysylltu â'r tîm datblygu gweithlu ac yn ychwanegu Pro-Care at y rhestr bostio.

Goruchwylio a gwerthuso

Anfonwyd copi o'r matrics goruchwyliaeth ac arfarnu ymlaen yn dilyn yr ymweliad, a chafwyd tystiolaeth bod yr holl staff yn yr eiddo wedi cwblhau eu harfarniad blynyddol. Yn yr un modd â'r matrics hyfforddiant, dim ond y mis a'r flwyddyn a gofnodwyd, ac argymhellir bod y dyddiadau llawn yn cael eu darparu i sicrhau cywirdeb.

Roedd y rhan fwyaf o sesiynau goruchwylio yn cael eu cynnal bob chwarter ac roedd un neu ddwy enghraifft ar y matrics lle oedd bwlch o bedwar mis yn hytrach na thri, ond cydnabuwyd y gallai hyn fod wedi'i achosi oherwydd gwyliau blynyddol, salwch ayyb. Roedd aelod o staff hefyd a gofnodwyd bod 'angen' goruchwyliaeth yn fuan.

Adroddwyd bod goruchwyliaethau yn cael eu cynnal mewn cyfarfodydd ffurfiol, cyfrinachol, 1:1 sydd wedi'u cynllunio fel sgwrs ddwyffordd lle mae'r un sy'n cael ei oruchwylio hefyd yn gysylltiedig ac yn gallu codi unrhyw faterion a chynnig eu barn eu hunain o'u perfformiad a'r gwasanaeth.

Gan mai'r rheolwr cartref yw'r unigolyn cyfrifol hefyd, datganwyd bod y rhan fwyaf o gefnogaeth yn dod gan y dirprwy reolwr a'r tîm staff. Nododd y swyddog monitro contract hefyd bod cefnogaeth ar gael trwy asiantaethau allanol megis rheolwyr gofal, gweithwyr proffesiynol iechyd, arolygiaeth gofal Cymru a thimau comisiynu.

Materion staffio

Cafwyd trafodaeth am sawl aelod o staff oedd wedi gadael y cwmni yn ystod y flwyddyn flaenorol a dywedodd y rheolwr bod tri wedi gadael; gadawodd un gan fod ganddynt ail swydd a bod eu hamgylchiadau personol wedi newid, gadawodd un y sector yn llwyr ac nid oedd y trydydd yn teimlo bod y rôl yr hyn yr oeddynt yn ei ddisgwyl. Adroddwyd eu bod wedi recriwtio'n llwyddiannus chwe aelod newydd o staff yn yr un cyfnod.

Adeg yr ymweliad nodwyd bod un aelod o staff cymorth ar salwch hirdymor ac roedd un ar gyfnod mamolaeth, a chyflenwyd ar gyfer y rhain trwy'r gronfa staff. Nid ydynt yn defnyddio asiantaeth ac mewn achos o argyfwng dylai'r staff gysylltu â naill ai'r rheolwr neu'r dirprwy reolwr sy'n gweithredu rota dyletswydd rhyngddynt. Nodwyd bod uwch aelodau o staff ond roedd rhywfaint o gynllunio olyniaeth ar y gweill gan fod aelod o staff profiadol sy'n mynd i gael ei gyflwyno i gwblhau eu NVQ lefel 4.

Camau Datblygu Cywirol / Datblygiadol (i'w cwblhau o fewn tri mis i ddyddiad yr adroddiad)

Cywirol

Y datganiad o ddiben i'w adolygu yn flynyddol o leiaf. Fersiwn 2 RISCA (Ebrill 2019) rheoliad 73.

Rhaid i'r rheolwr sicrhau bod holl aelodau staff wedi'u cofrestru â Gofal Cymdeithasol Cymru o fewn chwe mis i ddechrau cyflogaeth. Fersiwn 2 RISCA (Ebrill 2019) rheoliad 35.

Yr holl staff i gwblhau hyfforddiant yn ymwneud â chyfathrebu ac ymddygiad heriol. Fersiwn 2 RISCA (Ebrill 2019) rheoliad 29.

Rhaid i'r unigolyn cyfrifol ymweld â'r eiddo o leiaf bob tri mis a siarad â chleientiaid (lle fo'n bosibl) a staff a chynnwys tystiolaeth o'u hadborth yn eu hadroddiadau. Fersiwn 2 RISCA (Ebrill 2019) rheoliad 73.

Copïau o'r asesiad cychwynnol i fod ar gael. Fersiwn 2 RISCA (Ebrill 2019) rheoliad 15.

Y darparwr i ddangos tystiolaeth o gyflenwi neu weithio tuag at ymroi i gynnig gwasanaeth yn y Gymraeg i unigolion y mae'r Gymraeg yn famiaith iddynt. Fersiwn 2 RISCA (Ebrill 2019) rheoliad 24.

Datblygiadol

Dyddiadau llawn y cyrsiau hyfforddi, goruchwyliaethau, ac arfarniad i gael eu cofnodi yn yr holl fatrics.

Dylid cynnwys manylion cyswllt yr adran gwasanaethau i gwsmeriaid yn CBS Caerffili yn y datganiad o ddiben, polisi cwynion a'r polisi chwythu'r chwiban.

Dylid ystyried ychwanegu'r dyddiad adolygu nesaf ar y polisïau a'r gweithdrefnau.

Nodau tymor byr a thymor hir clir i gael eu datblygu gyda ffocws ar lesiant.

Casgliad

Nododd y swyddog monitro contract bod y ffeiliau wedi'u trefnu'n dda, a bod gwybodaeth ar gael yn rhwydd. Roedd yr holl bolisïau a gweithdrefnau yn fanwl ac yn adnodd defnyddiol ar gyfer tenantiaid ac aelodau staff.

Roedd gwybodaeth bersonol fanwl iawn ar gael a oedd yn cynnig gwybodaeth drylwyr o'r bobl a oedd yn cael eu cefnogi, beth yw eu hoffterau, eu diddordebau, eu trefn ac unrhyw beth a allai achosi unrhyw ofid iddynt ynghyd ag anghenion meddygol, meddyliol, ac iechyd corfforol. Pe bai dechreuwr newydd yn dechrau gyda'r cwmni, mae'r cynlluniau personol a'r asesiadau risg yn rhoi cipolwg cynhwysfawr i alluogi iddynt ddarparu cefnogaeth yn y ffordd y mae'r cleientiaid yn dymuno cael eu cefnogi.

Adnabu'r ymweliad chwe cham gweithredu cywirol a phedwar cam gweithredu datblygiadol, ac mae'r swyddog monitro contract yn hyderus y bydd y rhain yn cael eu cwblhau o fewn y tri mis nesaf. Oni bai y pennir bod hynny'n angenrheidiol, bydd yr ymweliad monitro nesaf â'r swyddfa mewn tua deuddeg mis.

Hoffai'r swyddog monitro contract fanteisio ar y cyfle hwn i ddiolch i'r dirprwy reolwr a'r rheolwr am eu hamser, eu cymorth a'u lletygarwch drwy gydol y broses fonitro ac edrycha ymlaen at ymweld â'r eiddo yn y flwyddyn newydd.

• Awdur: Amelia Tyler
• Dynodiad: Swyddog monitro contract
• Dyddiad: 14 Rhagfyr 2023