Cartref Gofal Ty-Penrhos
2 Ffordd Beddau, Caerffili, CF83 2AX
Nifer y gwelyau: 83 Cartref Gofal gyda Dementia Nyrsio
Categori: 10 Person Hŷn (Dementia Preswyl) / 58 Dementia (Nyrsio) / 15 Oedolion ag Anabledd Corfforol
Ffôn: 029 20854340
E-bost: Karen.Davis@hafod.org.uk
Gwefan: www.hafodcare.org.uk
Adroddiad Monitro Contract
- Enw/Cyfeiriad y darparwr: Cartref Nyrsio Glan-yr-Afon, Glan-yr-Afon Lane, Trelyn, Coed Duon NP12 3WA
- Dyddiad/Amser yr ymweliad: 28 Ebrill 2023
- Swyddog(ion) Ymweld: Caroline Roberts, Swyddog Monitro Contractau, Cyngor Bwrdeistref Sirol Caerffili
- Yn bresennol: Jay Ventura Santana, Nyrs Arweiniol ar gyfer Llywodraethu a Diogelu Cartrefi Gofal, Bwrdd Iechyd Prifysgol Aneurin Bevan / Karen Davis, Rheolwr y Cartref Karen Johns, Dirprwy Reolwr
Cefndir
Mae Tŷ Penrhos yn gartref gofal mawr pwrpasol yng Nghaerffili. Mae'r cartref wedi'i gofrestru i ddarparu nyrsio dementia a gofal preswyl dementia i 83 o bobl, ac mae darpariaeth ar wahân hefyd ar gyfer 15 o oedolion iau ag anabledd corfforol.
Cynhaliwyd yr ymweliad monitro llawn diwethaf yn 2022. Cynhaliwyd nifer o ymweliadau rhwng mis Medi a mis Tachwedd 2022, oherwydd pryderon ynghylch staffio a phrofiad amser bwyd. Yn ystod yr ymweliad, rhoddwyd camau unioni a datblygiadol.
Mae Swyddog Monitro yn defnyddio amrywiaeth o systemau monitro i gasglu a dehongli data fel rhan o ymweliadau monitro, gan gynnwys arsylwi ymarfer yn y cartref, archwilio dogfennaeth a sgyrsiau â staff, defnyddwyr gwasanaeth a pherthnasau lle bo modd.
Yn dibynnu ar ganfyddiadau'r adroddiad, caiff y darparwr gamau unioni a datblygiadol i'w cwblhau. Camau unioni yw rhai y mae'n rhaid eu cwblhau (yn unol â'r ddeddfwriaeth); argymhellion arfer da yw camau datblygiadol.
Canfyddiadau
Unigolyn Cyfrifol
Yr Unigolyn Cyfrifol yw Mr Marc Pullen-James. Mae disgwyl i adroddiadau chwarterol gael eu cynhyrchu yn adrodd ar berfformiad ac ansawdd y gwasanaeth. Mae hyn yn cynnwys archwilio gwisg staff, defnydd priodol o Gyfarpar Diogelu Personol, Rheoli Heintiau, rhyngweithio â phreswylwyr, gweithredu Polisïau a Gweithdrefnau Cartrefi, Archwiliadau, trafod gyda phreswylwyr a theulu i gael eu barn ar y gwasanaeth a ddarperir ac ati.
Pe na bai'r Unigolyn Cyfrifol a Rheolwr cofrestredig y Cartref ar gael, yn rhan o'r cynllun wrth gefn, y Dirprwy Reolwr a'r Arweinydd Clinigol fyddai'n goruchwylio'r gwasanaeth, gyda chymorth y Cyfarwyddwr Gofal.
Rheolwr Cofrestredig
Yn ystod y broses fonitro, gofynnwyd nifer o gwestiynau i Mrs Davis yn ymwneud â'r gwasanaeth. Cadarnhawyd nad oedd mwy nag un gwasanaeth yn cael ei reoli gan y Rheolwr Cartref Cofrestredig.
Mae teledu cylch cyfyng o amgylch yr adeilad ac yn y maes parcio, gydag arwyddion yn cael eu harddangos.
Pe bai digwyddiadau arwyddocaol yn codi, naill ai’n ymwneud â’r cartref ei hun neu’r unigolion sy’n byw yn y Cartref, mae’n ofynnol i’r Rheolwr Cofrestredig (o dan Ddeddf Rheoleiddio ac Arolygu Gofal Cymdeithasol (Cymru)) anfon dogfennau Rheoliad 60 at Arolygiaeth Gofal Cymru, yn ogystal ag anfon copi at Dîm Comisiynu'r Awdurdod Lleol. Ar adeg yr ymweliad, nid oedd unrhyw hysbysiadau heb eu clirio.
Holwyd y Rheolwr Cofrestredig ynghylch rhoi trefniadau diogelu wrth amddifadu o ryddid ar waith a dywedwyd wrth y swyddog ymweld, er bod yr holl geisiadau wedi'u cyflwyno, nad yw rhai unigolion wedi cael asesiad gan y Tîm Diogelu wrth Amddifadu o Ryddid eto.
Dywedodd Mrs Davis ei bod hi’n teimlo ei bod hi’n cael ei chynorthwyo gan yr Unigolyn Cyfrifol a'r tîm o staff er mwyn darparu amgylchedd diogel a gofalgar i breswylwyr Tŷ Penrhos.
Dogfennaeth
Edrychwyd ar ffeiliau dau breswylydd yn ystod yr ymweliadau cychwynnol. Roedd un ffeil yn cynnwys asesiad cyn-derbyn; fodd bynnag, sylwyd nad oedd yr ail ffeil yn cynnwys asesiad cyn-derbyn a dywedodd Rheolwr y Cartref bod hwn o bosibl wedi'i archifo.
Roedd gan y ddwy ffeil gynlluniau sy'n canolbwyntio ar yr unigolyn; fodd bynnag, nid oedd tystiolaeth i awgrymu bod yr unigolion neu aelodau/cynrychiolydd y teulu wedi cymryd rhan yn natblygiad un o'r cynlluniau.
Gwelwyd Asesiadau Risg. Arsylwodd y Swyddog Monitro ar Asesiadau Risg ynghylch Dementia, matiau synhwyro, cwympiadau, gwasgbwyntiau ac ati.
Gwelwyd bod rhai adolygiadau'n cael eu cynnal bob deufis, ond nad oedd rhai eraill. Argymhellir defnyddio cysondeb i sicrhau nad oes bylchau wrth adolygu dogfennaeth unigol.
Arsylwyd ar gofnodion dyddiol i gofnodi sut mae unigolion yn teimlo, eu hwyliau, pa weithgareddau sy'n cael eu gwneud, a oes angen anogaeth ar berson i ryngweithio ag eraill er mwyn cynnal cymdeithasu. Cedwir cofnodion ar wahân i gofnodi allbwn wrin a chyflwr croen unigolion. Fodd bynnag, mae'r Rheolwyr wedi cael llawer o drafodaethau gyda staff, wedi cael hyfforddiant ac wedi rhoi cymorth i staff i sicrhau eu bod nhw'n dogfennu ac yn casglu gwybodaeth berthnasol yn ystod yr amseroedd maen nhw'n gofalu am y preswylwyr. Dylai hyn barhau i ddigwydd ym mhob uned a bydd yn parhau i gael ei fonitro.
Mae dogfennaeth Gwen am Byth, sy'n ymwneud â gwella gofal ceg mewn lleoliadau gofal, yn parhau i gael ei defnyddio yn Nhŷ Penrhos. Arsylwyd ar Gynlluniau Personol ar gyfer gofal ymataliaeth, ysgarthu (Siart Ysgarthion Bryste), cyflwr croen (pecyn croen), mapio'r corff, Asesiadau Briwiau Pwyso, hyfywedd meinwe, cymhwyso safonau Amddifadu o Ryddid ac ati. Gwelwyd cyswllt priodol â gweithwyr proffesiynol hefyd, h.y. optegwyr, meddygon teulu.
Gwelwyd Trefniadau Diogelu wrth Amddifadu o Ryddid yn y ddwy ffeil yr edrychwyd arnyn nhw, ynghyd â ffurflenni cynghori Na Cheisier Dadebru Cardio-anadlol ar un ffeil. Eglurwyd i’r swyddog ymweld nad oedd teulu un unigolyn yn barod i drafod y pwnc sensitif hwn.
Ni welwyd Cynlluniau Personol Gadael mewn Argyfwng yn ffeiliau’r naill breswylydd na’r llall. Fodd bynnag, trafodwyd hyn gydag arweinwyr yr unedau yn ystod yr ymweliad monitro diwethaf. Dywedwyd wrth y swyddog ymweld bod y Cynlluniau Personol hynny yn cael eu cadw mewn ffeil ‘gydio’ yn swyddfa’r uned.
Mae gan y cartref Ddatganiad o Ddiben cyfredol (dyddiedig Ebrill 2022) a Chanllaw Defnyddiwr Gwasanaeth (dyddiedig Mawrth 2023), sy'n esbonio'r gwasanaeth mae'r cartref yn ei gynnig i breswylwyr a'r hyn y gallan nhw ei ddisgwyl gan y darparwr. Mae'n amlinellu'r strwythur staffio yn yr Hafod, a hefyd yn rhoi cefndir cryno i'r darllenydd o'r Unigolyn Cyfrifol a'r Cyfarwyddwr Gofal.
O fewn yr adroddiad monitro diwethaf, adroddwyd bod Hafod wedi gwneud newidiadau i'w offeryn dibyniaeth, a bod hyn yn golygu bod morâl staff yn isel ac, felly, yn effeithio ar yr unigolion ar yr unedau. Mae Datganiad o Ddiben 2023 wedi’i ddiwygio i adlewyrchu’r niferoedd staffio sydd eu hangen i ddarparu’r lefel o gymorth a ddisgwylir.
Staffio a Hyfforddiant
Mae'r cartref yn cynnwys 5 cymuned: Mountain View, Daffodil Rise, Caerphilly, Ogmore ac APD. Mae gan uned APD breswylwyr iau ag anabledd corfforol.
Ar adeg yr ymweliad cychwynnol, roedd Cydlynydd Gweithgareddau newydd wedi dechrau gweithio. Mae'r cartref yn parhau i ymdrechu i recriwtio Cydlynwyr Gweithgareddau ychwanegol oherwydd maint y cartref; fodd bynnag, mae staff gofal hefyd yn rhannu'r cyfrifoldeb o ddarparu gweithgareddau ac ysgogiad i'r preswylwyr.
Defnyddir staff asiantaeth yn ôl yr angen. Defnyddir asiantaeth reolaidd, a bydd gwiriadau priodol yn cael eu cynnal h.y. rhifau adnabod personol, cofrestriadau gyda Gofal Cymdeithasol Cymru, gwiriadau DBS ac ati. Os yn newydd i'r cartref, darperir sesiwn sefydlu.
Mae gan y cartref nifer o breswylwyr sy’n cyfathrebu trwy gyfrwng ieithoedd eraill h.y. Rwsieg, Pwyleg, Tsieinëeg ac ati. Mae’r staff yn cyfathrebu â’r unigolion drwy gyrchu apiau, lluniau a thrwy lyfrau amrywiol mae'r cartref yn eu prynu. Dywedodd Rheolwr y Cartref fod pob ymdrech yn cael ei wneud i gyfathrebu'n effeithiol â phreswylwyr o gefndiroedd ethnig gwahanol. Eglurodd Rheolwr y Cartref fod y cartref wedi prynu Beibl i un unigolyn ac wedi trefnu i Offeiriad Uniongred ymweld â'r cartref.
Dywedodd Rheolwr y Cartref fod rhai aelodau o staff yn gweithio mwy na 48 awr yr wythnos a bod pob aelod unigol o staff wedi llofnodi'r Gyfarwyddeb Waith.
Edrychwyd ar ddwy ffeil staff yn ystod yr ymweliad. Ni chadwyd y disgrifiad swydd yn y ffeil a dywedwyd wrth y Swyddog Monitro ei fod wedi'i roi i'r ddau ymgeisydd. Roedd y ddwy ffeil yn cynnwys CV yr aelodau staff unigol. Gwelwyd dau eirda ar gyfer pob unigolyn. Mae'r cartref yn mabwysiadu system sgorio wrth gyfweld. Roedd gan y ddwy ffeil gontract cyflogaeth; fodd bynnag, nid oedden nhw wedi eu llofnodi. Mae adran Adnoddau Dynol Hafod yn cadw gwybodaeth o’r fath. Roedd y ddwy ffeil unigol yn cynnwys manylion am wiriadau cyfredol y Gwasanaeth Datgelu a Gwahardd/Llywodraeth Gweriniaeth Pobl Bangladesh. Roedd y ddwy ffeil yn cynnwys copïau o dystysgrifau geni a ffotograffau o'r aelodau unigol o staff.
Cedwir tystysgrifau hyfforddiant ar-lein, a gwelodd y Swyddog Monitro dystysgrifau hyfforddiant yn ymwneud ag un aelod o staff yn unig. Dim ond yn ddiweddar oedd yr ail aelod o staff wedi dechrau gweithio yn y cartref ac, felly, bydd y ffeil hon yn cael ei gweld yn ystod monitro yn y dyfodol.
Fel gyda phob darparwr, argymhellir eu bod nhw'n cadw manylion cofrestriad staff gofal gyda Gofal Cymdeithasol Cymru. Argymhellir naill ai y dylid cadw'r dystysgrif ar ffeil neu'r rhif cofrestru, y dyddiad a'r dyddiad dod i ben.
Mae strwythur rheoli cryf yn ei le, gyda Rheolwr, Arweinydd Clinigol ac Arweinydd Uned ar gyfer pob un o'r unedau nyrsio ac unedau preswyl.
Yn ystod yr ymweliad, siaradodd y Swyddog Monitro ag aelod o staff a gofynnodd gyfres o gwestiynau yn ymwneud â'u cyflogaeth yn y cartref ac am y cymorth maen nhw'n ei ddarparu a'r hyn maen nhw'n ei gael fel gweithwyr. Roedd yr adborth a ddarparwyd yn gadarnhaol gyda'r aelod o staff yn dweud, pe bai preswylydd wedi cynhyrfu, eu bod nhw'n gwybod sut i'w cynorthwyo nhw. Roedden nhw'n gallu darparu'r wybodaeth gywir pe baen nhw'n gweld arfer gwael.
Dywedodd yr aelod o staff fod y cartref yn hybu annibyniaeth, gan gynorthwyo unigolion i wneud dewisiadau h.y. pa ddillad i’w gwisgo, mynd i'r gawod ac ati.
Hysbyswyd y Swyddog Monitro bod staff yn uned Ogmore (preswylwyr preswyl yn unig) yn cael eu harwain gan y preswylwyr o ran yr hyn y maen nhw am ei wneud. Roedd yr aelod o staff yn teimlo ei fod yn hyblyg yn ei rôl ac yn cael amser i eistedd a sgwrsio â'r preswylwyr.
Pan ofynnwyd a yw Rheolwr y Cartref yn treulio amser yn cerdded o amgylch y cartref, gan ymgysylltu â staff a phreswylwyr, roedd yr ymateb a gafwyd “yn dibynnu ar [ba waith] oedd ganddyn nhw."
Edrychodd y Swyddog Monitro ar y matrics hyfforddi, gwelwyd bod staff wedi mynychu hyfforddiant gorfodol; fodd bynnag, roedd y matrics hyfforddi yn nodi bod Diogelu Pobl Agored i Niwed yn cael ei gwblhau unwaith. Awgrymir bod y maes hwn o hyfforddiant yn cael ei gyflawni bob 3 blynedd ac, felly, argymhellir bod staff yn mynychu hyfforddiant cyn gynted â phosibl. Arsylwyd ar hyfforddiant gorfodol arall h.y. Symud a Thrin (Theori) 57.42% a Symud a Thrin (Ymarferol) 61.11 %, Hylendid Bwyd 81.56%, Rheoli Heintiau 85.26%, Cymorth Cyntaf 46.15%, Ymwybyddiaeth o Feddyginiaeth 78.02%. Cydnabyddir mai dim ond nyrsys cymwys a Chynorthwywyr Gofal Nyrsio sy'n cael caniatâd i roi meddyginiaeth. Ymgymerir â hyfforddiant nad yw'n orfodol hefyd h.y. DSE, GDPR (Diogelu Data), Urddas yn y Gweithle, Seiberddiogelwch, Cyfryngau Cymdeithasol, Think Before You Click, Epilepsi, ynghyd ag eraill.
Mae'r darparwr yn defnyddio e-ddysgu a dysgu yn yr ystafell ddosbarth.
Fel yr adroddwyd yn flaenorol, mae Rheolwr y Cartref yn gweld y matrics hyfforddi unwaith y mis i gael trosolwg o ba hyfforddiant sydd wedi dyddio, sydd angen ei adnewyddu ac ati. Mae gan bob Arweinydd Uned hefyd fynediad at y matrics ac yn gallu monitro datblygiadau/anghenion hyfforddi eu timau staff. Disgwylir i staff hefyd fod yn gyfrifol am unrhyw hyfforddiant maen nhw'n teimlo y gallai fod ei angen arnyn nhw i roi'r cymorth gorau i'r unigolion sy'n byw yn y cartref.
Caiff ansawdd yr hyfforddiant ei asesu drwy arsylwi sut mae staff yn ymgymryd â thechnegau/sgiliau newydd sydd wedi'u dysgu a sut maen nhw'n eu cyflawni. Mae technegau ac arferion newydd hefyd yn cael eu trafod yn ystod y sesiynau goruchwylio. Fodd bynnag, fel yr adroddwyd, wrth edrych ar y matrics hyfforddi ar gyfer 2022-2023, roedd yn amlwg nad yw goruchwyliaeth chwarterol rheolaidd yn digwydd yn ôl yr angen.
Mae'r cartref yn falch iawn o'i dîm staff a'r hunan-ddatblygiad mae unigolion yn ei gyflawni. Mae rhai o'r staff yn parhau i hyfforddi i ddod yn nyrsys cymwys.
Cyfleusterau / Arsylwadau
Canfuwyd bod arsylwadau cyffredinol y staff yn gadarnhaol; gwelwyd bod y staff yn rhyngweithio'n dda â'r unigolion maen nhw'n eu cynorthwyo, gan ddangos cynhesrwydd ac anogaeth.
Mae'r Rheolwr yn cynnal cyfarfod byr 10:10 bob bore gyda chynrychiolwyr o bob rhan o'r cartref, megis arweinwyr unedau, cydlynydd gweithgareddau, cogydd, staff cynnal a chadw ac ati. Arsylwodd y Swyddog Monitro ar y cyfarfod hwnnw ac roedd yn gadarnhaol gweld bod y staff yn darparu diweddariadau perthnasol am breswylwyr, staffio ac unrhyw faterion sydd angen sylw/camau gweithredu. Cafwyd sgyrsiau ynglŷn â phreswylwyr y dydd, gweithgareddau (garddio, nawr bod y tywydd yn gwella a hefyd Coroni’r Brenin), lleoedd gwag ar bob uned ac ati.
Gwelwyd bod y cartref yn lân, ac ni welwyd unrhyw beryglon ar adeg yr ymweliad.
Rheoli arian preswylydd
Derbynnir arian gan staff y dderbynfa, gan ddilyn yr un drefn o arwyddo i mewn ac allan. Fodd bynnag, dywedodd Rheolwr y Cartref fod mwyafrif y taliadau bellach yn cael eu gwneud drwy System Glirio Awtomataidd y Bancwyr.
Cynnal a Chadw'r Cartref
Mae gan Dŷ Hafod dîm ystad a gweithiwr ystad sy'n goruchwylio gwiriadau cynnal a chadw rheolaidd. Hefyd, defnyddir is-gontractwyr ar gyfer plymio, goleuadau ac ati.
Ar adeg yr ymweliadau, nid oedd unrhyw faterion wedi'u hadrodd o ran pryderon am yr eiddo. Dywedodd y Rheolwr fod gan y cartref berthynas waith dda gyda'r gwerthwr eiddo. Dywedodd y Rheolwr nad oedd un peiriant golchi yn gweithio ar adeg yr ymweliad ar ôl cael ei drwsio ychydig ddyddiau ynghynt. Mae hyn wedi'i adrodd ac mae peiriannau golchi eraill ar gael i'r staff eu defnyddio.
Mae preswylwyr yn gallu newid tymheredd eu hystafelloedd nhw.
Mae system wresogi newydd wedi'i gosod yn y cartref, gan wella'r gwresogi drwy'r cartref.
Gweithgareddau
Yn ystod yr ymweliad, roedd yn gadarnhaol gweld bod y staff yn ymgysylltu â’r preswylwyr a bod digon o wenu a chwerthin. Gwelwyd awyrgylch hamddenol rhwng y preswylwyr a'r staff.
Yn ystod yr ymweliad, gwelwyd preswylwyr yn paratoi eitemau ar gyfer Coroni'r Brenin ar 6 Mai 2023. Roedd baneri, rhubanau a modelau o Big Ben yn cael eu gwneud, gyda'r preswylwyr yn cynorthwyo'r staff i lynu baneri at ei gilydd a phaentio coronau papur.
Mae preswylwyr yn mwynhau ymweld â’r siopau a’r tafarndai lleol am brydau/diodydd. Yn ystod y tywydd cynhesach, mae garddio'n digwydd, mae prydau'n cael eu gweini'r tu allan, ac mae prynhawniau hufen iâ yn cael eu mwynhau.
Mae gweithgareddau'n digwydd ar yr unedau unigol ac yn ardal y ‘stryd’. Yn ddiweddar, mae'r cartref wedi mwynhau gwylio cywion yn deor ac yn datblygu. Mae cantorion opera wedi ymweld â’r preswylwyr a’u diddanu nhw ac mae’r cartref yn paratoi ar gyfer y Coroni a, hefyd, rownd derfynol cwpan yr FA, a fydd i’w gweld ar y sgrin fawr yn ardal y stryd, gyda diodydd a bwffe.
I’r rhai sy’n cael gofal yn y gwely, dywedodd Rheolwr y Cartref fod disgwyl i’r cydlynydd gweithgareddau ddarllen neu ddarparu ysgogiadau eraill h.y. tylino dwylo, gwrando ar gerddoriaeth ac ati.
Sicrhau Ansawdd
Rhannodd Mr Pullen ei adroddiadau chwarterol Rheoliad 73 gyda’r swyddog monitro, sy’n ymdrin â nifer o feysydd h.y. adborth Arolygiaeth Gofal Cymru, adolygiadau o bolisïau a gweithdrefnau, cwynion a chanmoliaeth.
Lefelau staffio, trafodaethau gyda Rheolwr y Cartref, staff a phreswylwyr/perthnasau.
Yn ystod yr ymweliad, bydd yr Unigolyn Cyfrifol yn edrych ar yr amgylchedd.
Mae'r adroddiad yn cloi drwy roi camau gweithredu sydd â dyddiad cwblhau gofynnol i Reolwr y Cartref. Bydd hyn wedyn yn cael ei ailystyried yn ystod yr ymweliad nesaf, sydd wedi’i drefnu ar gyfer 16 Mai 2023.
Camau Unioni / Datblygiadol
Camau Unioni
Dylai staff gyfarfod ar gyfer goruchwyliaeth un-i-un gyda'u rheolwr llinell neu swyddog cyfatebol, neu aelod uwch o staff, dim llai na bob chwarter. (RISCA Rheoliad 36.) Amserlen: Ar unwaith ac yn barhaus.
Dylai staff gwblhau hyfforddiant gorfodol mewn modd amserol h.y. Diogelu. (RISCA Rheoliad 36.) Amserlen: Ar unwaith ac yn barhaus
Gwelwyd bod rhai adolygiadau'n cael eu cynnal bob deufis, ond nad oedd rhai eraill. Argymhellir defnyddio cysondeb i sicrhau nad oes bylchau wrth adolygu dogfennaeth unigol. (RISCA Rheoliad 16.) Wrth fynd ymlaen, a bydd yn cael ei fonitro yn ystod yr ymweliad monitro nesaf.
Camau Datblygiadol
I ffeiliau staff gynnwys tystiolaeth o gofrestriad staff gyda Gofal Cymdeithasol Cymru.
Casgliad
Roedd y cartref i'w weld yn fwy sefydlog ers yr ymweliad diwethaf a gwelwyd bod morâl y staff yn gadarnhaol. Roedd y preswylwyr yn edrych yn dda, a gwelwyd gwên a chwerthin trwy gydol yr ymweliad.
Bydd monitro rheolaidd yn parhau, a hoffai'r swyddogion ymweld ddiolch i'r staff am eu lletygarwch yn ystod yr ymweliadau.
- Awdur: Ceri Williams
- Swydd: Swyddog Monitro Contractau
- Dyddiad: 23 Mai 2023