• Newyddion    Newyddion    Ionawr 2023    Cafodd Ysgol Gymunedol Sant Cenydd ymweliad arbennig gan Andrew Bailey, Llywodraethwr Banc Lloegr

News Centre

Cafodd Ysgol Gymunedol Sant Cenydd ymweliad arbennig gan Andrew Bailey, Llywodraethwr Banc Lloegr

Postiwyd ar : 24 Ion 2023

Cafodd Ysgol Gymunedol Sant Cenydd ymweliad arbennig gan Andrew Bailey, Llywodraethwr Banc Lloegr
Ymwelodd Andrew Bailey, Llywodraethwr Banc Lloegr, â disgyblion Ysgol Gymunedol Sant Cenydd yn ddiweddar. Roedd yr ymweliad yn gyfle gwych i fyfyrwyr ddysgu am waith Banc Lloegr ac economi'r Deyrnas Unedig.

Ar ôl cyrraedd am 10.00am, cafodd Mr Bailey ei groesawu i’r ysgol gan y Pennaeth, Miss Rebecca Collins; y Dirprwy, Mr Ceri Bown; yn ogystal â’r Prif Ferch, Katie Nash a’r Prif Fachgen, Kyle Parson.

Hefyd, roedd y Cynghorydd Eluned Stenner, Aelod Cabinet y Cyngor dros Gyllid a Pherfformiad, yn bresennol, yn ogystal ag Ian Derrick a Steve Hicks sy'n cynrychioli Asiantaeth Cymru Banc Lloegr.

Yn ystod yr ymweliad, roedd araith fer gan Mr Bailey i 100 o ddisgyblion a gymerodd ran wedyn mewn sesiwn ryngweithiol gyda’r Llywodraethwr. Cafodd Mr Bailey ei holi gan y myfyrwyr o ran nifer o bynciau yn amrywio o sut datblygodd ei yrfa mewn cyllid, sut gallai cryptoarian gael effaith ar economi’r Deyrnas Unedig i benderfyniadau parhaus Banc Lloegr i fynd i’r afael â chwyddiant drwy’r cynnydd mewn cyfraddau llog.

Yn dilyn hyn, gweithiodd y Llywodraethwr â grŵp llai o fyfyrwyr sy’n rhan o Glwb Menter yr ysgol; roedd disgyblion yn eiddgar i drafod eu cynnig busnes ar gyfer menter technoleg symudol gynaliadwy.

Dywedodd Andrew Bailey, Llywodraethwr Banc Lloegr, “Roeddwn i'n falch iawn o gwrdd â disgyblion Ysgol Gymunedol Sant Cenydd yn ystod fy ymweliad diweddar â Chymru ac mae eu cwestiynau craff iawn ar yr economi wedi gwneud argraff arnaf i. Roedd hi'n ysbrydoledig cwrdd â phobl ifanc mor ymroddedig a chlywed eu dyheadau ar gyfer y dyfodol.”

Dywedodd Rebecca Collins, Pennaeth Ysgol Gymunedol Sant Cenydd, “Roedd yn anrhydedd croesawu Llywodraethwr Banc Lloegr i Ysgol Gymunedol Sant Cenydd.  Mwynheuodd ein myfyrwyr yn fawr iawn y cyfle i drafod a deall ymhellach faterion economaidd pwysig sy'n effeithio ar eu bywydau nawr ac yn y dyfodol.”

Ychwanegodd y Cynghorydd Eluned Stenner, Aelod Cabinet dros Gyllid a Pherfformiad, “Roedd hi'n wych bod yn bresennol ar gyfer ymweliad y Llywodraethwr ag Ysgol Gymunedol Sant Cenydd. Yn y cyfnod heriol hwn, roedd hi'n wych gweld y myfyrwyr yn cymryd cymaint o ran yn eu sesiwn holi ac ateb a chael y cyfle i glywed yn uniongyrchol gan Mr Bailey ar faterion sy’n effeithio ar yr economi.”

Newyddion Diweddar
Ymholiadau'r Cyfryngau