Safonau wedi'u Cysoni ar gyfer Trwyddedu Tacsis a Cherbydau Hurio Preifat

Mae angen i ni edrych ar bolisi'r Cyngor, a gwneud newidiadau iddo, sef “Polisi ar gyfer Gyrwyr a Gweithredwyr Cerbydau Hacni a Cherbydau Hurio Preifat”, oherwydd bod Llywodraeth Cymru a’r Adran Drafnidiaeth wedi gofyn i bob Cyngor weithio i’r un safonau.

Tacsis a cherbydau hurio preifat: canllawiau trwyddedu | LLYW.CYMRU

I ddechrau, rydyn ni'n edrych ar ofynion y Gwasanaeth Datgelu a Gwahardd (DBS), gwiriadau cofnodion troseddol tramor, gofynion ychwanegol ar gyfer gweithredwyr cerbydau hurio preifat ac archwiliadau meddygol ar gyfer gyrwyr, ac rydyn ni'n cynnig y newidiadau a ganlyn.

Beth yw'r newidiadau arfaethedig a beth fydd hyn yn ei olygu i chi ac ymgeiswyr newydd?

Gwiriad y Gwasanaeth Datgelu a Gwahardd bob 6 mis ar gyfer pob gyrrwr.

Wrth wneud eu cais nesaf am grant neu adnewyddu, bydd angen i yrwyr naill ai ymuno â gwasanaeth Diweddaru’r Gwasanaeth Datgelu a Gwahardd neu ddarparu Gwiriad Manwl y Gwasanaeth Datgelu a Gwahardd bob 6 mis. Bydd gwiriad y Gwasanaeth Datgelu a Gwahardd hwn yn benodol ar gyfer rôl gyrrwr tacsi/cerbyd hurio preifat. Ni fydd gyrwyr bellach yn gallu cael eu gwiriad y Gwasanaeth Datgelu a Gwahardd drwy'r Uned Trafnidiaeth Integredig.Cost ymuno â’r gwasanaeth diweddaru yw £13 y flwyddyn.

Gofyniad datgelu sylfaenol ar gyfer perchnogion cerbydau wrth wneud cais. (Nid oedd hyn yn ofyniad o'r blaen wrth wneud ceisiadau am drwyddedau cerbyd. Nid yw'n ofynnol i ymgeiswyr sydd eisoes yn dal trwydded gyrru cerbyd hacni neu hurio preifat gyda'r awdurdod hwn ddarparu'r datgeliad sylfaenol fel rhan o'u cais am drwydded cerbyd hacni/cerbyd hurio preifat.)

Gwiriad cofnodion troseddol tramor ar gyfer ymgeiswyr am drwyddedau cerbyd a thrwydded gweithredwr cerbydau hurio preifat. (Mae hyn eisoes wedi'i wneud ar gyfer gyrwyr)

Bydd yn rhaid i ddeiliaid trwyddedau gweithredwyr cerbydau hurio preifat wneud datgeliadau sylfaenol o aelodau staff (nid gyrwyr yn unig) sy'n gweithio iddyn nhw a chael mynediad at gofnodion archebu neu anfon cerbydau.

Lle mae'r ymgeisydd/gweithredwr yn cyflogi personau neu'n bwriadu cyflogi personau sy'n cymryd archebion neu'n anfon cerbydau, rhaid i'r gweithredwr gynhyrchu polisi ar gyflogi cyn-droseddwyr yn y rolau hynny.

Mae'n rhaid i'r gweithredwr hurio preifat gadw cofrestr o'r holl staff o'r fath a fydd yn cynnwys cofnod o bryd y mae pob gwiriad y Gwasanaeth Datgelu a Gwahardd wedi'i gynnal. Rhaid i'r gofrestr hon fod ar gael i'w harchwilio gan swyddog awdurdodedig yr awdurdod trwyddedu ar gais. Dylai’r gofrestr gynnwys y canlynol:

• Y dyddiad y dechreuodd cyflogaeth y person hwnnw yn y rôl honno
• Y dyddiad y gwiriodd y gweithredwr dystysgrif y Gwasanaeth Datgelu a Gwahardd
• Enw'r person a wiriodd dystysgrif y Gwasanaeth Datgelu a Gwahardd
• Y dyddiad y rhoddodd y person y gorau ar gyflawni'r rôl honno.
• Rhaid cadw'r gofrestr am 6 mis, yn unol â'r cofnodion archebu
• Os caiff cyflogai ei dynnu oddi ar y gofrestr a’i roi yn ôl ar y gofrestr yn ddiweddarach, dylai’r gweithredwr weld tystysgrif sylfaenol newydd gan y Gwasanaeth Datgelu a Gwahardd (neu ddefnydd o’r Gwasanaeth Diweddaru).

Rhaid i'r gweithredwr fynnu bod yr holl staff a gyflogir i gymryd archebion neu anfon cerbydau yn rhoi gwybod i'r gweithredwr o fewn 48 awr am unrhyw euogfarn, rhwymiad, rhybudd, cerydd neu arestiad am unrhyw fater troseddol tra byddant yn cael eu cyflogi yn y rôl hon.

Bydd angen i ymgeiswyr newydd a gyrwyr presennol gyrraedd safonau meddygol Grŵp 2 yr Asiantaeth Trwyddedu Gyrwyr a Cherbydau ar gyfer ffitrwydd i yrru. Rhaid i'r asesiad meddygol gael ei gynnal gan feddyg teulu’r ymgeisydd ei hun neu feddyg teulu arall ym mhractis cofrestredig yr ymgeisydd sydd â mynediad llawn at ei gofnodion meddygol. (O dan amgylchiadau eithriadol, a dim ond ar ôl cael caniatâd yr Awdurdod Trwyddedu ymlaen llaw, gall asesiad meddygol gael ei gynnal gan bractis cofrestredig arall ar yr amod bod hanes meddygol llawn yr ymgeisydd wedi cael ei weld a'i asesu gan y meddyg teulu hwnnw.)

Mae angen cyrraedd safonau meddygol Grŵp 2 yr Asiantaeth Trwyddedu Gyrwyr a Cherbydau ar gyfer ffitrwydd i yrru.

• Pan wneir cais, a
• Bob 5 blynedd rhwng 45 oed a 65 oed
• Bob blwyddyn pan fo'r gyrrwr yn 65 oed neu drosodd Neu unrhyw bryd fel sy'n ofynnol gan yr Awdurdod Trwyddedu neu'r ymarferydd meddygol.
• Rhaid cynnal archwiliad meddygol Grŵp 2 hefyd os gofynnir am hynny ar unrhyw adeg gan yr awdurdod trwyddedu neu'r ymarferydd meddygol.

Bydd y ddarpariaeth ganlynol o fewn y polisi gyrwyr presennol yn cael ei ddileu, sef… ‘Lle mae’r Asiantaeth Trwyddedu Gyrwyr a Cherbydau wedi gofyn am archwiliad meddygol Grŵp 2 boddhaol er mwyn rhoi’r hawl i yrrwr yrru coetsis a lorïau ac ati sy’n cael ei adlewyrchu ar ei drwydded gan yr Asiantaeth Trwyddedu Gyrwyr a Cherbydau, efallai na fydd angen cyflwyno ffurflen feddygol wedi’i llenwi i’r awdurdod lleol.’

Mae’r ffurflen feddygol yn ddilys am 4 mis o’r dyddiad y mae’r meddyg, yr optegydd neu’r optometrydd sy’n cynnal yr archwiliad yn ei llofnodi.