News Centre

Mae cynigion buddsoddi mawr gwerth cyfanswm o £231 miliwn wedi'u dadorchuddio gan Gyngor Bwrdeistref Sirol Caerffili, gan ddangos glasbrint cyffrous ac uchelgeisiol ar gyfer yr ardal gyfan yn y dyfodol.

Mae'r Cyngor wedi datblygu fframwaith cynhwysfawr ‘Llunio Lleoedd’ a fydd yn gosod cyfeiriad buddsoddi ar draws yr ardal dros yr ychydig flynyddoedd nesaf.

Bydd trigolion ledled y Fwrdeistref Sirol yn cael eu hannog i ddweud eu dweud a helpu i lunio'r cynigion, gan eu bod yn allweddol wrth helpu i gyflawni'r jig-so i sicrhau bod y Cyngor yn targedu ei fuddsoddiad lle mae ei angen fwyaf.

Yn ogystal â chynigion buddsoddi yn y dyfodol, mae'r fframwaith Llunio Lleoedd hefyd yn nodi'r hyn a wariwyd dros y blynyddoedd diwethaf, yn ogystal â'r hyn sydd eisoes wedi'i gymeradwyo ac sydd ar y gweill ar gyfer y dyfodol agos. Mae'r prif ffigurau allweddol fel a ganlyn:

• £153 miliwn – y swm a wariwyd hyd yn hyn rhwng 2017 a 2020 ar becynnau buddsoddi mawr gan gynnwys datblygu ysgolion newydd, gwella priffyrdd gan gynnwys cylchfan Pwll-y-pant, gwella tai cyngor fel rhan o SATC a buddsoddi mewn caeau 3G.
• £129 miliwn – buddsoddiad sydd ar y gweill ar hyn o bryd ar brosiectau y cytunwyd arnynt fel dymchwel eiddo ar Fryn Hafodyrynys, datblygiad tai Gardd y Siartwyr, gwelliannau fel rhan o SATC a chyfleusterau hamdden gan gynnwys trac rhedeg newydd yn Oakdale a buddsoddi mewn cae 3G ychwanegol.
• £231 miliwn – buddsoddiad wedi'i gynllunio ar gyfer y dyfodol yn cynnwys ystod eang o gynigion a fydd yn destun ymgynghori ac ymgysylltu â'r gymuned fel rhan o drafodaeth Llunio Lleoedd.

Croesawodd Arweinydd y Cyngor, y Cynghorydd Philippa Marsden, y cynigion cyffrous, “Bydd ein cymunedau i gyd yn elwa ar becyn buddsoddi cyffredinol sydd werth mwy na £485 miliwn, sy'n gyflawniad rhyfeddol ac yn dangos yn glir ein hymrwymiad i adfywio a thrawsnewid y Fwrdeistref Sirol. Mae symiau enfawr o arian yn cael eu gwario mewn meysydd allweddol fel tai, addysg, priffyrdd, trafnidiaeth a hamdden gyda chynlluniau i fuddsoddi hyd yn oed yn fwy dros y blynyddoedd i ddod.”

“Rydyn ni wedi gosod rhaglen fuddsoddi uchelgeisiol i'n cymunedau i'w helpu nhw allan o bandemig COVID-19, gan ddarparu optimistiaeth a gwytnwch ar gyfer y dyfodol. Rydyn ni am gael y gymuned i gymryd rhan lawn yn y broses hon, felly byddwn ni hefyd yn amlinellu ffyrdd i drigolion gymryd rhan dros y misoedd nesaf i ddweud eu dweud a helpu i lunio dyfodol eu cymuned.”

Bydd y fframwaith Llunio Lleoedd hwn yn rhan bwysig o gynllun adfer y Cyngor yn sgil COVID-19, sydd â'r nod o gefnogi cymunedau lleol wrth iddynt ddechrau dod allan o bandemig COVID-19. Bydd hefyd yn dod â manteision economaidd-gymdeithasol ychwanegol o ran creu swyddi lleol a chefnogi'r economi leol a chadwyni cyflenwi ac ati.

Bydd yr adroddiad Llunio Lleoedd llawn yn cael ei ystyried mewn cyfarfod craffu arbennig yr wythnos nesaf cyn cyfarfod y Cabinet ar 24 Chwefror. Mae'r adroddiad ar gael yma: